پیام معاونت فرهنگی باشگاه نفت مسجدسلیمان مهندس حسین سوسنی غریبوند برای یار دوازدهم

به وقت هیاری

با درود و عرض ادب و احترام ویه دنیایی مهر خدمت همه هم تبارون خصوصاً گویل و دوویل بختیاری

ز روزی که تیم نفت اوی به مسلیمون با همه مشکلاتی که سر راهس قرار داشت وقتی اردیم ورزشگاه که بازیهانه سیل بکنیم بااو شور و نشاطی که سر سکوها بید
ایما سرتاپا غرور ابیدیم و به خومون ابالستیم که ایقدر هواخواه وحامی داریم
گوویلوم چه وابیده که ز یک به دیر وستیم به طوریکه منه شهر خومون احساس غریوی بمون دست اده
کجه رهدن او همه عاشقی که شهرهانه با هزینه شخصی سی تعصب نام بختیاری خطر اکردن و ازیدن به دل جاده ها و همو باعث وابید که اسم تیم نفت بعنوان یه تیم پرطرفدار منه کشور شناخته وابوهه
انتظار داروم که هر کینه و کدورت و ناراحتی که من دلتون هد فراموش کنین و به هیاریمون بیاین
باور کنین که بیشتر ز پنجاه درصد نتیجه هایی که ایما من سالای گذشته اگردیم فقط سی همو انرژی های مثبتی بید که ایسا ز سر سکوها به بازیکنا و ساق پاهاسون منتقل اکردین
چطور غیرتتون ساز ایاره که پرچم بختیاری بوفته به گل؟
ایما افتخارمون بختیاری بیدنمونه که ز یه قوم ریشه دار با اصالتیم
وقتی سی یه کار خیر وتفاقی بنگ اکردیم ز هر محله دویست سیصدتا جاهل رشتال ادیدیم منه دوو
په حالا کجه ردن شیر دلون هفت وچار؟؟
مو بعنوان نماینده رسمی یار دوازدهم منه باشگاه نفت والبته ز طرف مسئولین مربوطه ومدیریتمون که سخت به دین ساختارسازی هد ای قول به دَدویَلُم اِدم که ز سال دیه جایگاه سونه راست بکنیم که جور بی‌بی مریم بیان ورزشگاه به تِکیمون
و یه کانون هواداران جدید سیسون تشکیل بدیم
ولی ز همی حالا لازم هد که هر کینه ایشنین دور و وَرتون یه نهیو بِس بدین که نَهلِنمون تک وتنها

دلوم تنگه سی هیجار و هیاری
به سی روزی که نفت اوید به بختیاری
بدونین که تیم نفت بختیاری اصالت داره
ولی فعلا حال و احوال خوشی نداره
درمون دردس طی ایسانه
چون روز تنگ و تفاق بختیاری الانه

همتون وابا یکدیه روز جمعه ۱۴۰۴/۱/۲۲ساعت ۵:۳۰ بیاین به ورزشگاه شهید بهنام محمدی منه مسلیمون و نهلین ای بیرق بوفته به ری گل چون امید یه شهر و کلی جوون و نوجوونه

مندیرتونیم…